Alþjóðlegt orgelsumar dafnar enn sem fyrr og sóttu um 600 manns viðburði tónleikaraðarinnar í síðustu viku. Tónlistarlífið í Hallgímskirkju heldur áfram af sama krafti því á næstu vikum verða fernir tónleikar í viku hverri, einir kórtónleikar og þrennir fjölbreytilegir orgeltónleikar.

Helgina 17. og 18. júlí bjóðum við Winfried Bönig, dómorganistann í Köln, velkominn í Hallgrímskirkju. Dómorganistinn í Köln er þekktur víða um heim bæði sem orgelleikari og hljómsveitarstjóri. Auk þess er hann mikils metinn kennari við Tónlistarháskólann í Köln. Hann heldur reglulega tónleika víða um heim og hefur leikið inn á fjölmarga geisladiska. Laugardagstónleikarnir sem hefjast kl. 12 á hádegi hefjast á Prelúdíu og fúgu í D-dúr eftir J.S. Bach. Á eftir fylgja verk eftir Pachelbel, Mozart og Widor, en tónleikunum lýkur á hinni frægu tokkötu úr 5. sinfóníu Widors. Á tónleikum sunnudagsins, sem hefjast kl. 17, heyrast meðal annars orgelumritanir á hljómsveitarverkunum Funérailles eftir Liszt og Plánetunum eftir Holst. Miðaverð á hádegistónleikana er 1000 kr en á tónleikum sunnudagsins er miðaverðið 1500 kr. Miðasala er við innganginn. Frítt er á alla tónleikana fyrir félaga í Listvinafélagi Hallgrímskirkju.

 

Birna Hjaltadóttir, 16/7 2010 kl. 12.50