Fréttir af fermingarstarfinu. 

Hinn 19 september var farið í Kaldársel.  Óhætt er að segja að sú ferð hafi tekist í alla staði mjög vel.  Veðrið var prýðilegt, sól, en haustsvali og logn. Börnin stóðu sig afskaplega vel, framkoma þeirra til fyrirmyndar og mikil skemmtun fyrir okkur leiðbeinendurna að vera með þeim.  Sjálf sögðu þau eftir ferðina að hún hefði verið “bara fín”, og þykir það góð einkunn.  Stefnt er að sólarhringsferð í Vatnaskóg í byrjun mars.

Nú eru afstaðnir 3 fræðslutímar til viðbótar þeim í Kaldárselsferðinni.  Í tíma 2 voru sýndar ýmsar “Jesúmyndir” og rætt um áhrif myndlistar á hugmyndina um Jesú og guðsmyndina. Einnig hve við túlkun hugmyndir okkar um Jesú á misjafnan hátt.  Gerður var stuttlega samanburður á kristinni trú og öðrum trúarbrögðum, en annars verður farið meir í það efni síðar. Í síðasta tíma var rætt um spurninguna: Hvað er trú. Út frá því spunnust umræður um líf og tilveru mannsins, m.a. undir hvaða kringumstæðum reynir á trúna, t.d. í erfiðleikum, áföllum o.s.frv. Síðan var spjallað saman um nauðsyn þess fyrir hvern mann að fá hvíld og geta átt kyrrðarstund af og til. Þar eru íslensk náttúra og kirkjan góðir staðir til þess. 

Í næsta tíma verður byrjað á því að fjalla um Biblíuna.  Sjá “næsti tími”.  (30.09.2009).