Hallgrímskirkja

Á morgun, miðvikudaginn 28. mars, er morgunmessa kl. 08.00 í Hallgrímskirkju. Séra Jón Dalbú Hróbjartsson þjónar fyrir altari, Valdimar Viðar Leifsson flytur hugvekju, Birna G. Hjaltadóttir fer með bæn, Grétar Einarsson er forsöngvari og Birna Gunnarsdóttir aðstoðar við altarisgöngu. Á eftir messunni er léttur morgunverður í safnaðarsalnum í umsjá Sigrúnar V. Ásgeirsdóttur. Allir hjartanlega velkomnir.

Biblíulestrar á föstu eru í safnaðarsal kirkjunnar kl. 20.00 til 21.00 í umsjá séra Jóns Dalbú Hróbjartssonar og séra Irmu Sjafnar Óskarsdóttur. Á morgun er síðasta skiptið.

Á laugardaginn 24. mars, er opnun sýningar PRENTLIST OG PASSÍUSÁLMAR KL. 14.00 í forkirkju Hallgrímskirkju á ljósmyndum af völdum titilsíðum Passíusálmanna gegnum tíðina. Jafnframt býðst gestum að hlýða á hljóðrit af söng gömlu Passíusálmalaganna, sem starfsmenn Árnastofnunar tóku upp á árabilinu 1960-1975. Myndirnar af titilsíðum sálmanna sýna bæði þróun prentlistar og breytingar sem verða á bókatitlum frá 17. öld og til nútímans. Ennfremur birta myndirnar brot úr útgáfusögu Passíusálmanna. Sýningin er samstarf Listvinafélags Hallgrímskirkju, Stofnunar Árna Magnússonar í íslenskum fræðum og Landsbókasafns Íslands - Háskólabókasafns. Þórunn Sigurðardóttir bókmenntafræðingur hefur umsjón með sýningunni.

Á sunnudaginn 25. mars, sem er fimmti sunnudagur í föstu og Boðunardagur Maríu, er messa og barnastarf kl. 11.00. Séra Irma Sjöfn Óskarsdóttir prédikar og þjónar fyrir altari ásamt messuþjónum. Félagar úr Mótettukór Hallgrímskirkju leiða messusönginn. Organisti er Hörður Áskelsson. Barnastarfið er í umsjá Magneu Sverrisdóttur djákna. Kaffisopi á eftir messu. Allir hjartanlega velkomnir.

Ensk messa er kl. 14.00. Séra Árni Svanur Daníelsson prédikar og þjónar fyrir altari, organisti er Hörður Áskelsson, forsöngvari er Guðrún Finnbjarnardóttir. Kaffi og meðlæti eftir messu. Allir hjartanlega velkomnir.

Tónleikar kl. 17.00 MAGNIFICAT - ORGEL OG GREGORSÖNGUR (sjá umfjöllun fyrir neðan).

Næstkomandi sunnudag, þann 25. mars kl. 17.00, býður Listvinafélag Hallgrímskirkju til orgeltónleika í Hallgrímskirkju á 30. starfsári sínu. Hörður Áskelsson organisti kirkjunnar, sem fagnar 30 ára starfsafmæli í vor flytur þýska og franska barokktónlist í samspili við sönghóp úr Mótettukór Hallgrímskirkju. Efnisskráin er helguð deginum, sem er Boðunardagur Maríu og ber yfirskriftina MAGNIFICAT - ORGEL OG GREGORSÖNGUR. Á efnisskránni eru orgelverk eftir Buxtehude, Dandrieu, Guilain og Marchand. Hörður flytur þrjár stærri tónsmíðar við Lofsöng Maríu, fantasíu eftir Dietrich Buxtehude og tvær Magnificat-svítur eftir frönsku tónskáldin Guilain og Dandrieu. Frönsku verkin verða flutt að hætti síns upprunatíma í víxlsöng við lítinn sönghóp karla úr Mótettukórnum. auk þess verða fluttir nokkrir sálmforleikir Buxtehudes við þekkt sálmalög, sem Hallgrímur Pétursson valdi fyrir Passíusálma sína. Sönghópurinn syngur valið passíusálmavers eftir flutning hvers orgelforleiks. Lokaverk tónleikanna er “Le Grand Dialogue” eftir franska barokkhöfundinn Louis Marchand, sem á sínum tíma kom við sögu margra kirkna Parísar og einnig frönsku hirðarinnar. Tónleikarnir taka um eina klukkustund í flutningi. Miðasala er við innganginn og er miðverð 2000 kr. en afsláttarverð 1500 kr.

Á morgun, miðvikudaginn 21. mars, er árdegismessa kl. 08.00 í Hallgrímskirkju. Alla miðvikudaga allt árið um kring er morgunmessa kl. 08.00. Á morgun þjónar séra Jón Dalbú Hróbjartsson fyrir altari, Kristján Þorgeirsson flytur hugvekju, Valdimar Viðar fer með bæn, Sigrún V. Ásgeirsdóttir er forsöngvari og Guðlaugur Leósson aðstoðar við altarisgöngu. Á eftir messunni, sem er um það bil hálf klukkustund, er léttur morgunverður í safnaðarsal kirkjunnar í umsjá Birnu Gunnarsdóttur og Þorsteins Guðlaugssonar. Allir hjartanlega velkomnir.

Opið hús fyrir söfnuð Hallgrímssóknar er kl. 14.00. Þar munu hjónin Inga Rós Ingólfsdóttir sellóleikari og Hörður Áskelsson kantor og organisti Hallgrímskirkju segja frá námsárum sínum í Þýskalandi og upphafi starfs Harðar í Hallgrímskirkju, en nú eru 30 ár síðan Hörður hóf starf sem organisti við Hallgrímskirkju. Þau hjón munu einnig leika á selló og píanó ásamt tveim barnabörnum sínum sem leika á selló og horn. Léttar kaffiveitingar. Allir hjartanlega velkomnir.

Biblíulestrar á föstu í Hallgrímskirkju á morgun miðvikudaginn 21. mars kl. 20 - 21:00.  Prestar kirkjunnar fara yfir texta píslasögunnar.  Inngangur í Suðursal Eiríksgötumegin.  Allir hjartanlega velkomnir og aðgangur er ókeypis.

Á sunnudaginn 18. mars, sem er fjórði sunnudagur í föstu, er messa og barnastarf í Hallgrímskirkju kl. 11.00. Séra Jón Dalbú Hróbjartsson prédikar og þjónar fyrir altari ásamt messuþjónum. Fyrrum félagar úr Mótettukór Hallgrímskirkju leiða messusönginn. Organisti er Björn Steinar Sólbergsson. Barnastarfið er í umsjá Magneu Sverrisdóttur djákna. Kaffisopi á eftir messu. Allir hjartanlega velkomnir.

Alla fimmtudaga er kyrrðarstund í hádeginu í Hallgrímskirkju.  Orgelleikur, íhugun og bæn.  Súpa og brauð í safnaðarsal eftir stundina.  Allir hjartanlega velkomnir.

Biblíulestra á föstu í Hallgrímskirkju í kvöld kl. 20 - 21 í suðursal. Prestar kirkjunnar fara yfir texta píslasögunnar.  Inngangur í Suðursal er Eiríksgötumegin.  Allir velkomnir og aðgangur er ókeypis.

Á morgun, fimmtudaginn 15. mars, er kyrrðarstund í Hallgrímskirkju kl. 12.00. Orgelleikur, íhugun og bæn. Á eftir stundinni er léttur hádegisverður í safnaðarsal kirkjunnar. Allir hjartanlega velkomnir.

Á morgun, miðvikudaginn 14. mars, er morgunmessa í Hallgrímskirkju kl. 08.00. Séra Irma Sjöfn Óskarsdóttir þjónar fyrir altari, Guðlaugur Leósson flytur hugvekju, Helga Hróbjartsdóttir fer með bæn og Sigurður Björnsson er forsöngvari. Á eftir messunni er léttur morgunverður í safnaðarsal kirkjunnar í umsjá Sigrúnar V. Ásgeirsdóttur. Allir hjartanlega velkomnir.