Hallgrímskirkja

Listvinafélag Hallgrímskirkju gengst fyrir tónleikum í Hallgrímskirkju á allra sálna messu, sunnudaginn 2. nóvember kl. 17. Fram kemur kammerkórinn Schola cantorum undir stjórn Harðar Áskelssonar.

Hlutur endurreisnartónlistar verður mikill á þessum tónleikum en tvö samtímaverk, eftir þá Þorkel Sigurbjörnsson og Eric Whitacre, ramma efnisskrána inn.

Lesa áfram …

Sunnudagurinn 2. nóvember, sem er tuttugasti og fjórði sunnudagur eftir þrenningarhátíð og allra heilagra messa, hefst á fræðslumorgni í safnaðarsal kirkjunnar kl. 10.00. Katrín Jakobsdóttir, alþingismaður og varaformaður Vinstri grænna, mun reifa stöðu kirkjunnar og kristinnar siðfræði í nútímanum út frá ríkjandi efnahagsástandi og sjónarhóli stjórnmálamannsins. Kl. 11.00 er messa og barnastarf. Séra Birgir Ásgeirsson prédikar og þjónar fyrir altari ásamt messuþjónum. Schola Cantorum leiðir almennan safnaðarsöng og syngur meðal annars Mótettu eftir Þorkel Sigurbjörnsson byggða á 121. Davíðssálmi undir stjórn Harðar Áskelssonar kantors, sem einnig er organisti. Barnastarfið er í umsjá Rósu Árnadóttur. Kaffisopi að venju eftir messu. Kl. 17.00 eru tónleikar, þar sem Schola Cantorum mun syngja kirkjuleg verk eftir nokkur þekkt tónskáld. Aðgangseyrir kr. 2.500.-/1.800.-.

Fræðslumorgnar í Hallgrímskirkju hefjast kl. 10.00 á sunnudögum og eru öllum opnir og aðgangur er ókeypis. Heitt er á könnunni eftir erindin fram að messunni sem hefst kl. 11.00. Sunnudaginn 19. október flutti dr. Sólveig Anna Bóasdóttir, lektor í guðfræðilegri siðfræði við guðfræðideild Háskóla Íslands erindi um vistguðfræði og umhverfissiðfræði. Þetta er málefni sem brennur á mörgum og er einn umtalaðasti vandi samtímans, en ekki eru allir á eitt sáttir um hvernig leysa beri. Erindi dr. Sólveigar er birt hér á heimasíðu Hallgrímskirkju í heild sinni og er undir liðnum “Safnaðarstarf”, undirliður “fræðslumorgnar”.

Sunnudaginn 26. október, sem er 23. sunnudagur eftir þrenningarhátíð, Hallgrímsdagur og 50 ára afmæli Kirkjuþings, er messa kl. 11.00 í Hallgrímskirkju. Biskup Íslands, herra Karl Sigurbjörnsson, prédikar og þjónar fyrir altari ásamt vígslubiskupum, sr. Jóni A. Baldvinssyni og sr. Sigurði Sigurðarsyni, sr. Jóni Dalbú Hróbjartssyni prófasti og sr. Birgi Ásgeirssyni. Messuþjónar eru Kirkjuþingsfulltrúar og messuhópur frá Hallgrímskirkju. Forseti Kirkjuþings, Pétur Kr. Hafstein og Dagný Halla Tómasdóttir lesa ritningarlestra. Mótettukór Hallgrímskirkju syngur undir stjórn Harðar Áskelssonar. Organisti er Björn Steinar Sólbergsson. Umsjón með barnastarfinu hefur Rósa Árnadóttir. Allir velkomnir. Kaffi eftir messu. Kl. 14.00 ensk messa. Séra Bjarni Þór Bjarnason prédikar og þjónar fyrir altari. Organisti er Hörður Áskelsson, forsöngvari er Jónína Kristinsdóttir. Kaffi eftir messu.

Óratóríukór Niðarósdómkirkju heldur tónleika í Hallgrímskirkju, sunnudaginn 19. október 2008 kl. 17.00. Miðaverð kr. 2000.-. Sjá nánar á www.listvinafélag.is.

Sunnudagurinn 19. október, sem er tuttugasti og annar sunnudagur eftir þrenningarhátíð, hefst með fræðslumorgni kl. 10.00 í safnaðarsalnum. Dr. Sólveig Anna Bóasdóttir, lektor í guðfræðilegri siðfræði við guðfræðideild Háskóla Íslands, ræðir hér um vistguðfræði og umhverfissiðfræði. Erindi hennar nefnist “Er hlýnun jarðar guðfræðilegt vandamál?”. Kl. 11.00 er messa og barnastarf í kirkjunni. Góðir gestir frá Þrándheimi í Noregi, Óratóríukórinn við Niðarósdómkirkju, syngur í messunni undir stjórn Vivianne Sydnes. Organistar eru Þröstur Eiríksson og Petra Björkhaug. Messuþjónar eru úr röðum norænna stúdenta. Prestar eru séra Jón Dalbú Hróbjartsson, séra Jón Ómar Gunnarsson, séra Guðni Már Harðarson og séra Bodil Slördal. Umsjón með barnastarfinu hefur Rósa Árnadóttir. Kl. 17.00 eru tónleikar þar sem Óratóríukór Niðarósdómkirkju syngur norsk úrvalsverk fyrir kirkjukór.

Lesa áfram …

Sunnudagurinn 12. október, sem er tuttugasti og fyrsti sunnudagur eftir þrenningarhátíð, hefst á fræðslumorgni í safnaðarsalnum kl. 10.00. Fræðsluerindið ber heitið: Æðruleysisbænin. Að erindinu loknu er messa kl. 11.00 í Hallgrímskirkju. Séra Jón Dalbú Hróbjartsson prédikar og þjónar fyrir altari ásamt séra Birgi Ásgeirssyni, fermingarbörnum og messuþjónum. Schola Cantorum syngur undir stjórn Harðar Áskelssonar, sem jafnframt er organisti. Barnastarfið er í umsjá Rósu Árnadóttur. Kaffisopi eftir messu.

Lesa áfram …

Á sunnudaginn 5. október, sem er tuttugasti sunnudagur eftir þrenningarhátíð, hefst dagurinn á fræðslumorgni kl. 10.00. Dr. Sigurður Pálsson, fyrrum sóknarprestur í Hallgrímskirkju flytur erindi sem hann nefnir: “Trúarbragðafræðsla í skólum. Hvað er að gerast?” Kl. 11.00 er messa og barnastarf. Séra Birgir Ásgeirsson prédikar og þjónar fyrir altari ásamt séra Maríu Ágústsdóttur og messuþjónum. Drengjakór Reykjavíkur í Hallgrímskirkju syngur í messunni undir stjórn Friðriks S. Kristinssonar. Organisti er Björn Steinar Sólbergsson. Barnastarfið er í umsjá Rósu Árnadóttur. Kaffisopi eftir messu að venju.

Lesa áfram …

Á sunnudaginn 28. september, sem er nítjándi sunnudagur eftir þrenningarhátíð, er messa og barnastarf kl. 11.00 í Hallgrímskirkju. Séra Irma Sjöfn Óskarsdóttir prédikar og þjónar fyrir altari ásamt séra Maríu Ágústsdóttur og messuþjónum. Laudatekórinn frá Strömstad í Svíþjóð syngur í messunni undir stjórn Sigfrid Runbäck. Undirleikari er Karin Rosander. Forsöngvari í almennum safnaðarsöng er Guðrún Finnbjarnardóttir. Organisti er Hörður Áskelsson. Barnastarfið er í umsjá Rósu Árnadóttur. Kaffisopi eftir messu og ávaxtasafi fyrir börnin. Kl. 14.00 er ensk messa. Séra Bjarni Þór Bjarnason prédikar og þjónar fyrir altari. Organisti er Hörður Áskelsson og Guðrún Finnbjarnardóttir er forsöngvari. Kaffi og meðlæti eftir messu.

Þrátt fyrir byggingaframkvæmdir á turninum og múrbrot höldum við ótrauð áfram innra starfi kirkjunnar. Þrjár messur og ein bænastund eru í hverri viku, auk enskrar messu síðasta sunnudag hvers mánaðar, sjá undir liðnum “Helgihald” til vinstri á síðunni. Barna- og æskulýðsstarf er á mánudögum, þriðjudögum og miðvikudögum og fermingarfræðsla á þriðjudögum. Opið hús fyrir foreldra ungra barna er á miðvikudögum undir stjórn Jódísar Káradóttur og opið hús fyrir aldraða á þriðjudögum og föstudögum í umsjá Margrétar Hróbjartsdóttur. Rósa Árnadóttir sér um barnastarfið á sunnudögum. Tónlistarlíf er mjög fjölbreytt í Hallgrímskirkju. Tveir organistar og einn söngstjóri sjá um kórana fimm. Sjá nánar undir “Safnaðarstarf” og “Listir”. Listvinafélagið sér um tónleika og listsýningar í forkirkjunni. Nú í haust hafa kórar frá öðrum löndum heimsótt Hallgrímskirkju. Á sunnudaginn var söng Konsertforeningens kor frá Kaupmannahöfn í messunni. Næsta sunnudag, þann 28.09., syngur Laudatekórinn frá Strömstad í Svíþjóð í messunni og í messu sunnudagsins 5. október syngur Drengjakór Reykjavíkur. Sunnudaginn 19. október kemur kór Dómkirkjunnar í Niðarósi í Noregi í heimsókn og syngur í messu þess sunnudags.