Hallgrímskirkja

Alla miðvikudaga, allt árið um kring, er árdegismessa í Hallgrímskirkju kl. 08.00. Á morgun, miðvikudaginn 20. febrúar, þjónar séra Jón Dalbú Hróbjartsson fyrir altari, Árni Svanur Daníelsson flytur hugvekju og Birna Gunnarsdóttir fer með bæn. Léttur morgunverður í safnaðarsalnum á eftir messunni. Allir velkomnir.

Tónlistarhópurinn Camerarctica kemur nú í annað sinn fram á vegum Listvinafélags Hallgrímskirkju, en hópurinn flutti Kvartett um endalok tímans eftir Olivier Messiaen í Hallgrímskirkju á afmælisári Listvinafélagsins 2007. Camerarctica hefur starfað frá árinu 1992 um það leyti sem hljóðfæraleikararnir komu heim frá námi við tónlistarháskóla erlendis. Félagar hópsins hafa meðal annars leikið með Sinfóníuhljómsveit Íslands, kennt hljóðfæraleik við tónlistarskólana á höfuðborgarsvæðinu og komið víða fram sem einleikarar. Camerarctica hefur sérstaklega vakið athygli og hlotið lofsamlega dóma fyrir flutning sinn á verkum Mozarts á árlegum kertaljósatónleikum í kirkjum á höfuðborgarsvæðinu og á strengjakvartettum Shostakovitch á tónleikum Kammermúsikklúbbsins í Reykjavík. Hópurinn hefur leikið á Myrkum músíkdögum, Listahátíð í Reykjavík, Norrænum músikdögum, Salisbury hátíðinni í Bretlandi og gefið út geisladisk með verkum eftir W.A. Mozart. Camerarctica var útnefndur Tónlistarhópur Reykjavíkurborgar árið 2005. Kammerhópurinn Camerarctica eru: Ármann Helgason klarinett, Hallfríður Ólafsdóttir flauta, Hildigunnur Halldórsdóttir fiðla, Ingrit Karlsdóttir fiðla, Guðrún Þórarinsdóttir víóla, Sigurgeir Agnarsson celló. Á tónleikunum Sálmar og tónaljóð syngur Marta Guðrún Halldórsdóttir sópransöngkona með hópnum.

Sálmar á atómöld eftir Elínu Gunnlaugsdóttur var samið árið 2004 fyrir Camerarctica við ljóð eftir Matthías Johannessen. Tónskáldið tónskreytir valin ljóð úr ljóðabálki Matthíasar með sópranrödd, flautu, klarinettu og strengjakvartett.

Þorkell Sigurbjörnsson hefur samið nýtt verk fyrir Camerarctica og notar hann sálmatexta föður síns, herra Sigurbjörns Einarssonar biskups, sem hefst á orðunum “þú heimsins ljós”.

Klarinettukvintett tónskáldsins og orgelleikarans Max Regers er síðasta stórvirki höfundarins, saminn veturinn 1915-1916. Það minnir um margt á klarinettukvintetta Mozarts og Brahms hvað varðar form og hljóðfæraskipan.

Fjórði fræðslumorgunn þessa misseris er á sunnudaginn 17. febrúar kl. 10.00 í safnaðarsal Hallgrímskirkju. Séra Petrína Mjöll Jóhannesdóttir, prestur í Reykjavíkurprófastsdæmi vestra, flytur fyrirlesturinn: Styrking sjálfsmyndar á heimilinu. Petrína hefur á undanförnum árum haldið fjölmörg námskeið í sjálfsstyrkingu bæði fyrir konur og einnig unglinga og skrifað efni til notkunar í kirkjustarfi. Hér mun hún sækja í þann sjóð og fjalla um aðferðir til sjálfsstyrkingar á heimilinu. Messa og barnastarf sunnudagsins, sem er annar sunnudagur í föstu, hefjast kl. 11.00. Séra Birgir Ásgeirsson prédikar og þjónar fyrir altari ásamt séra Irmu Sjöfn Óskarsdóttur og messuþjónum. Organisti er Björn Steinar Sólbergsson. Félagar úr Mótettukór Hallgrímskirkju leiða safnaðarsönginn. Barnastarfið er í umsjá Magneu Sverrisdóttur, djákna. Kaffisopi eftir messu að venju.

Á morgun, fimmtudaginn 14. febrúar, er kyrrðarstund í hádeginu kl. 12.00. Orgelleikur, hugvekja/bæn. Á eftir er léttur hádegisverður í safnaðarsalnum. Allir velkomnir.

Á morgun, miðvikudaginn 13. febrúar, er árdegismessa í kór Hallgrímskirkju að venju. Messan hefst kl. 08.00 og stendur yfir í um það bil 40 mínútur. Séra Birgir Ásgeirsson þjónar fyrir altari í messu morgundagsins, sr. Kristján Valur Ingólfsson flytur hugvekju og Birna G. Hjaltadóttir fer með bæn. Á eftir er léttur morgunverður í safnaðarsal kirkjunnar. Allir velkomnir.

Alla þriðjudaga er fyrirbænaguðsþjónusta/messa í kapellu Hallgrímskirkju kl. 10.30-11.00. Annan hvern þriðjudag er altarisganga. Beðið fyrir sjúkum. Á þriðjudögum er einnig starf eldri borgara í kórkjallara frá kl. 11.00-14.00 undir stjórn Margrétar Hróbjartsdóttur. Allir velkomnir.

Á fræðslumorgni í suðursal Hallgrímskirkju næstkomandi sunnudag, 10. febrúar, sem er fyrsti sunnudagur í föstu, flytur Benedikt Jóhannesson, sálfræðingur hjá Fjölskylduþjónustu kirkjunnar, erindi um foreldra og börn. Benedikt hefur verið ötull talsmaður fjöslkyldunnar í íslensku þjóðfélagi. Hann gerði rannsókn árið 2006 um líðan barna eftir fjölskylduaðstæðum og mun í erindi sínu skoða farsæld barna í því ljósi. Fræðslumorgunn hefst kl. 10.00 og lýkur laust fyrir kl. 11.00, en þá hefst messan í kirkjuskipinu. Séra María Ágústsdóttir, héraðsprestur, prédikar og þjónar fyrir altari ásamt séra Þorvaldi Víðissyni, miðborgarpresti, og messuþjónum. Drengjakór Reykjavíkur í Hallgrímskirkju syngur í messunni undir stjórn Friðriks S. Kristinssonar. Organisti er Hörður Áskelsson, kantor. Sunnudagaskólinn er á sínum stað og börnin eru hvött til að koma í öskudagsbúningunum sínum. Kaffisopi eftir messu.

Á morgun, miðvikudaginn 6. febrúar, sem er öskudagur, er messa kl. 08.00 í Hallgrímskirkju. Messan er í umsjá séra Kristjáns Vals Ingólfssonar. Á morgun er þess einnig minnst, að árdegismessur hófust í Hallgrímskirkju fyrir 5 árum. Af því tilefni verður boðið upp á afmælistertu með kaffinu í safnaðarsalnum á eftir messunni. Allir velkomnir.

Á kyndilmessu, laugardaginn 2. febrúar, er orgelandakt í Hallgrímskirkju kl. 12.00. Björn Steinar Sólbergsson leikur á orgelið og séra Birgir Ásgeirsson annast ritningarlestur. Leikin verða verk eftir J.S. Bach og Ch. Widor. Fræðslumorgunn er á undan messunni kl. 10.00 á sunnudag 3. febrúar, sem er sunnudagur í föstuinngang. Það er dr. Árelía Eydís Guðmundsdóttir, stjórnmálafræðingur og lektor við viðskipta- og hagfræðideild HÍ, sem talar um bjartsýni og von andspænis erfiðleikum undir yfirskriftinni “Mót hækkandi sól”. Í messunni kl. 11.00 prédikar sr. Birgir Ásgeirsson og þjónar fyrir altari ásamt sr. Maríu Ágústsdóttur og hópi messuþjóna. Organisti er Björn Steinar Sólbergsson og kórsöng annast félagar úr Mótettukór Hallgrímskirkju. Barnastarfið er á sama tíma í umsjón Magneu Sverrisdóttur djákna.

Lesa áfram …

Fimmtudaginn 31. janúar er kyrrðarstund í Hallgrímskirkju kl. 12.00. Orgelleikur og íhugun. Léttur hádegisverður í safnaðarsal á eftir. Allir velkomnir.