Hallgrímskirkja

Á sunnudaginn 9. desember, sem er annar sunnudagur í aðventu, er messa og barnastarf kl. 11.00. Séra María Ágústsdóttir prédikar og þjónar fyrir altari ásamt séra Jóni Dalbú Hróbjartssyni. Messuþjónar aðstoða. Unglingar tendra tvö ljós á aðventukransinum. Magnea Sverrisdóttir djákni hefur umsjón með barnastarfinu. Karlakór Reykjavíkur syngur undir stjórn Friðriks S. Kristinssonar, en þeir hafa nú í mörg ár sungið eina aðventumessu í kirkjunni. Organisti er Hörður Áskelsson kantor.

Laugardaginn 8. desember er söngur og orgeltónlist á jólaföstu frá kl. 12.00 til 17.00 í Hallgrímskirkju. Aðgangur er ókeypis, en tekið verður á móti framlögum til Hjálparstarfs kirkjunnar. Kaffihús verður í safnaðarsal kirkjunnar og ilmandi veitingar seldar til styrktar starfi Listvinafélags Hallgrímskirkju. Dagskráin er eftirfarandi: Sjá “áfram”.

Lesa áfram …

Kyrrðarstund er að venju kl. 12.00 á fimmtudaginn 6. desember. Orgelleikur, hugvekja/bæn. Léttur hádegisverður í safnaðarsal á eftir kyrrðarstundinni. Allir velkomnir.

Um síðustu helgi var fjölbreytt dagskrá í Hallgrímskirkju. Á laugardag hófst Jólatónlistarhátíðin með Orgelandakt kl. 12.00, þar sem Björn Steinar Sólbergsson lék á orgel kirkjunnar og sr. Birgir Ásgeirsson hafði ritningarorð og bæn. Kl.14.00 var opnun aðventusýningar í forkirkjunni, en listamaðurinn er Arngunnur Ýr Gylfadóttir. Á sama tíma var Kvenfélag Hallgrímskirkju með jólafundinn sinn.

Mótettukórinn söng þrisvar sinnum fyrir fullu húsi undir stjórn Harðar Áskelssonar kantors, en einsöngvari var Gissur Páll Gissurarson. Hljófæraleikur var í höndum Björns Steinars Sólbergssonar orgelleikara og strengjasveit lék undir forystu Guðnýjar Guðmundsdóttur. Hátíðarmessa og barnastarf var kl. 11.00 á sunnudeginum, en þar prédikaði biskup Íslands Karl Sigurbjörnsson. Safnað var til Hjálparstarfs kirkjunnar. Um 3000 manns sóttu athafnir og tónleika helgarinnar.

Fimmtudaginn 6. desember kl. 20.00 eru jólatónleikar Drengjakórs Reykjavíkur. Með kórnum syngja félagar úr Karlakór Reykjavíkur, ásamt Gunnari Guðbjörnssyni óperusöngvara. Orgelleikari er Lenka Mátéová. Stjórnandi er Friðrik S. Kristinsson. Drengjakór Reykjavíkur, sem starfar við Hallgrímskirkju, kemur nú í fyrsta sinn fram á Jólatónlistarhátíð Hallgrímskirkju, en kórinn starfar af miklum krafti og kemur m.a. fram í helgihaldi Hallgrímskirkju í hverjum mánuði. Flutt verður fjölbreytt jólatónlist. Miðaverð kr. 1.500.-/1.200.-.

Nú styttist dagurinn óðum og jafnframt tíminn til jóla. Á þessum árstíma er þörf fyrir kyrrð og frið og þá er gott að byrja daginn með árdegismessu í Hallgrímskirkju. Á morgun, miðvikudaginn 5. desember, er messa kl. 08.00. Séra Jón Dalbú Hróbjartsson þjónar fyrir altari, séra Ása Björk Ólafsdóttir flytur hugvekju og Birna G. Hjaltadóttir les bæn. Á eftir er sameiginlegur morgunverður í safnaðarsalnum. Allir velkomnir.

Alla þriðjudaga, allt árið eru fyrirbænaguðsþjónustur/messur í kapellu Hallgrímskirkju kl. 10.30 - 11.00. Beðið fyrir sjúkum. Starf eldri borgara er í kórkjallara kl. 11.00 - 14.00 alla þriðjudaga og föstudaga. Allir velkomnir.

Laugardagurinn 1. desember hefst með orgelandakt kl. 12.00. Björn Steinar Sólbergsson leikur orgelverk eftir J.S. Bach, D. Buxtehude og Andrew Carter. Sr. Birgir Ásgeirsson flytur ritningarlestur og bæn. Ókeypis aðgangur. Kl. 14.00 er opnun aðventusýningar - Land ég sá. Arngunnur Ýr Gylfadóttir sýnir ný verk unnin með olíu á ál í forkirkju Hallgrímskirkju. Við opnunina syngur Berglind Björgúlfsdóttir forna aðventusöngva án undirleiks.

Sunnudaginn 2. desember, sem er fyrsti sunnudagur í aðventu, er Hátíðarmessa kl. 11.00. Biskup Íslands, herra Karl Sigurbjörnsson prédikar og þjónar fyrir altari ásamt séra Jóni Dalbú Hróbjartssyni, séra Birgi Ásgeirssyni og Magneu Sverrisdóttur, djákna. Mótettukór Hallgrímskirkju syngur undir stjórn Harðar Áskelssonar, kantors Hallgrímskirkju. Organisti er Björn Steinar Sólbergsson.

Jólatónleikar Mótettukórs Hallgrímskirkju eru kl. 17.00 sunnudaginn 2. desember. Miðasala í Hallgrímskirkju, opið alla daga frá 09.00 til 17.00. Miðaverð kr. 3.000.-/2.400.-

Lesa áfram …

Á morgun, fimmtudaginn 29. nóvember, er kyrrðarstund í Hallgrímskirkju kl. 12.00. Orgelleikur, hugvekja/bæn. Léttur hádegisverður á vægu verði í safnaðarsal eftir kyrrðarstundina. Allir velkomnir.

Á morgun, miðvikudaginn 28. nóvember, er árdegismessa kl. 08.00 í kór Hallgrímskirkju að venju. Gott er að eiga hljóðláta stund árla morguns í kirkjunni áður en önn dagsins byrjar. Séra Kristján Valur Ingólfsson þjónar fyrir altari, séra Birgir Ásgeirsson flytur hugvekju og Sigrún V. Ásgeirsdóttir les bæn. Á eftir er sameiginlegur morgunverður í safnaðarsalnum. Allir velkomnir.