Hallgrímskirkja

Sunnudagurinn 21. október, sem er tuttugasti sunnudagur eftir þrenningarhátíð, hefst með fræðslumorgni kl. 10.00. Efni hans heitir: Nýja biblíuþýðingin: kirkjubiblía, biblíuhefð og tryggðin við frumtextann. Dr. Guðrún Kvaran er prófessor við hugvísindadeild Háskóla Íslands. Hún kom að nýrri þýðingu Biblíunnar sem formaður þýðingarnefndar Gamla testamentisins og apókrýfu bókanna og var einnig í þýðingarnefnd Nýja testamentisins. Í erindinu verður fjallað um þá vinnu alla, biblíuhefðina og trúna við frumtextann og rætt um breytt viðhorf til tungumálsins. Að loknum fræðslumorgni er messa og barnastarf kl. 11.00. Biblían verður borin inn í kirkjuna af unglingi í inngöngusálmi messunnar ásamt ljósberum og krossbera. Séra Jón Dalbú Hróbjartsson prédikar og þjónar fyrir altari ásamt séra Guðna Má Harðarsyni, skólapresti og hópi messuþjóna. Barnastarfið er í umsjá Magneu Sverrisdóttur, djákna, en börnin taka einnig á móti nýju Biblíunni í sitt starf. Hópur úr Mótettukór Hallgrímskirkju syngur undir stjórn Harðar Áskelssonar, kantors, sem einnig er organisti. Söfnun dagsins rennur til Hins íslenska Biblíufélags. Kl. 17.00 eru tónleikar, þar sem Jón Þorsteinsson, tenórsöngvari, flytur 15 sálma af nýlega útkomnum hljómdiski sínum, sem ber nafnið “Ó Jesú, að mér snú”, við undirleik Harðar Áskelssonar, organista.

Lesa áfram …

Á miðvikudögum allt árið um kring er árdegismessa í kór Hallgrímskirkju kl. 08.00. Gott er að byrja daginn á kyrrlátri stund í kirkjunni áður en gengið er út í ys og þys borgarinnar. Messan stendur yfir í um það bil 40 mínútur. Á morgun, miðvikudaginn 17. október, er það séra Birgir Ásgeirsson sem þjónar fyrir altari og flytur hugvekju, Birna Hjaltadóttir fer með bæn og Sigurður Björnsson er forsöngvari. Á eftir fáum við okkur léttan morgunverð og spjöllum saman yfir kaffibolla í safnaðarsalnum. Allir velkomnir.

Á þriðjudögum, allt árið um kring, er fyrirbænaguðsþjónusta kl. 10.30 - 11.00 í kapellu Hallgrímskirkju. Beðið fyrir sjúkum. Annað hvort skipti er altarisganga. Allir velkomnir.

Sem oft endranær er mikið um að vera í Hallgrímskirkju á sunnudagsmorguninn. Ástæða er til að hvetja fólk til að koma, vera með og njóta. Dagskráin er fjölbreytt og vönduð.

Fræðslustund kl. 10:00. Á sunnudaginn þann 14. október, sem er nítjándi sunnudagur eftir þrenningarhátíð, hefst dagskráin á því að sr. Bjarni Þór Bjarnason, sem er prestur í Grafarvogskirkju og annast einnig enskar messur mánaðarlega í Hallgrímskirkju, segir frá siðbótarmanninum Lúther, konu hans Katarínu frá Bora og því umhverfi sem mótaði þau. Fræðslan hefst kl. 10.00 og er lokið tímanlega fyrir messu. Allir eru velkomnir og heitt á könnunni.

Messan og barnastarfið kl. 11:00. Sr. Birgir Ásgeirsson, predikar og þjónar fyrir altari ásamt sr. Maríu Ágústdóttur. Fermingarbörn verða messuþjónar, en Drengjakór Reykjavíkur í Hallgrímskirkju syngur undir stjórn Friðriks S. Kristinssonar, kórstjóra. Organisti er cantor kirkjunnar og söngmálastjóri þjóðkirkjunnar, Hörður Áskelsson. Á Suðursal kirkjunnar verður síðan kaffi á könnunni í messulok. Verið með í sókninni!

Á fimmtudögum eru kyrrðarstundir í Hallgrímskirkju kl. 12.00. Orgelleikur og hugvekja. Á eftir er léttur hádegisverður á vægu verði í safnaðarsalnum. Allir velkomnir.

Á miðvikudögum, allt árið um kring, kl. 08.00, er árdegismessa í kór Hallgrímskirkju. Nú í október, þegar daginn styttir og líður að aðventu, er gott að eiga kyrrláta stund í kirkjunni. Á morgun, miðvikudaginn 10. október, er það séra Jón Dalbú Hróbjartsson sem þjónar fyrir altari, Kristján Þorgeirsson flytur hugvekju og Dóra Þorkelsdóttir fer með bæn. Á eftir eigum við sameiginlega stund með morgunverði í safnaðarsalnum. Allir velkomnir.

Alla þriðjudaga kl. 10.30 til 11.00 er fyrirbæn í kapellu Hallgrímskirkju. Annan hvern þriðjudag er gengið til altaris. Beðið fyrir sjúkum. Allir velkomnir.

Fræðslumorgunn og messa í Hallgrímskirkju

Fræðslumorgnar í Hallgrímskirkju hefjast að nýju á sunnudaginn með erindi dr. Sigríðar Þorgeirsdóttur sem hún nefnir: Guð sem karl eða kona - eða hvorugt? Guð hefur í sögu kristinna kenninga lengst af verið karl og faðir og Jesús sonur, bróðir og vinur. Á síðustu áratugum hafa femínískir guðfræðingar og heimspekingar leitað eftir kvenleika guðdómsins svo konur geti samsamað sig hinu guðlega líkt og karlar. Er þörf á guði karlleika eða kvenleika? Eða erum við vaxin upp úr persónugerðum guði? Dr. Sigríður Þorgeirsdóttir, dósent í heimspeki við Háskóla Íslands, reifar þessar spurningar á Fræðslumorgni í suðursal Hallgrímskirkju kl. 10.00. Á eftir er gengið til messu þar sem sr. María Ágústsdóttir prédikar og þjónar fyrir altari ásamt sr. Birgi Ásgeirssyni og hópi messuþjóna. Organisti er Björn Steinar Sólbergsson og félagar úr Mótettukórnum leiða söng. Samskot eru tekin til safnaðarstarfsins. Börnin eiga sína stund í norðursalnum undir leiðsögn Magneu Sverrisdóttur, djákna. Vertu með í sókninni.

Við minnum á kyrrðarstundirnar okkar á fimmtudögum kl. 12.00. Á morgun, fimmtudaginn 4. október er kyrrðarstund að venju með orgelleik og hugvekju. Á eftir er léttur hádegisverður í safnaðarsal. Allir velkomnir.

Á laugardaginn 6. október er orgelandakt í hádeginu og byrjar kl. 12.00. Björn Steinar Sólbergsson mun leika á Klaisorgelið. Séra Jón Dalbú Hróbjartsson fer með ritningarlestur og bæn. Enginn aðgangseyrir. Allir velkomnir.

Alla miðvikudaga allt árið um kring er árdegismessa kl. 08.00 í Hallgrímskirkju. Gott er að eiga kyrrláta stund í kór Hallgrímskirkju árla dags og njóta birtunnar sem flæðir inn um kórgluggana. Á morgun, miðvikudaginn 3. október er það séra Kristján Valur Ingólfsson sem þjónar fyrir altari, Sigrún V. Ásgeirsdóttir flytur hugvekju og Ágústa Þorbergsdóttir fer með bæn. Á eftir messunni er morgunverður í safnaðarsalnum þar sem við eigum gott og uppbyggilegt samfélag. Allir velkomnir.