Jólin hans Hallgríms í Þýskalandi

Jólin hans Hallgríms í Þýskalandi

Fyrir jólin kom út í Þýskalandi bókin Norræn jól (Skandinavische Weinachten) hjá Oetinger forlaginu í Hamborg. Þar er meðal annars að finna þýðingu Florence Groizier á Jólunum hans Hallgríms eftir Steinunni Jóhannesdóttur með myndum Önnu Cynthiu Leplar. Í bókinni er auk þess birt Jólasveinakvæði Jóhannesar úr Kötlum með myndum Erlu Siguðardóttur og sagan Jólin í Hælavík eftir Jakobínu Sigurðardóttur, myndskreytt af Imke Sönnischen.

Norræn jól er veglega úr garði gerð bók, um 22o síður í stóru broti og ríkulega myndskreytt. Þar eru fegurstu norrænu jólasögurnar sagðar af höfundum eins og Astrid Lindgren, Selmu Lagerlöf, Hans Christian Andersen, Ellen Reumert, Jo Tenfjord, Tor Åge Bringsværd, Tove Jansson, Zacharias Topelius og fleiri, ásamt myndum Elsu Beskow, Katrin Enkelking, Sven Nordqvist,  Carola Sturm og fleiri listamanna. Einnig er greint lítillega frá ýmsu sérkennilegu sem tengist jólahaldi og aðventu í Danmörku, Finnlandi, Noregi, Svíþjóð og á Íslandi. Jólasveinarnir ásamt Grýlu og Leppalúða og skötuilmur á Þorláksmessu eru talin einkennandi fyrir Ísland.

Í Hallgrímskirkju hefur í desember verið sýning á gömlu jólunum sem gerð er eftir sögu Steinunnar og hefur hún verið fjölsótt, bæði af börnum og ferðafólki. Sýningin verður opin fram að 6. janúar.