Nakið altari

Af hverju er allt tekið af altarinu í kirkjunni á skírdagskvöldi? Af hverju er altarið nakið föstudaginn langa og allt fram á páskamorgun? Í Hallgrímskirkju sem og mörgum kirkjum heimsins er Getsemanestund á skírdagskvöldi. Eftir messugerð eru ljósin slökkt í kirkjunni, prestur afskrýðist hökli og síðan er lesinn texti í 14 kafla Markúsarguðspjalls um för Jesú til Getsemanegarðs. Slökkt er á altarisljósunum. Ljósastjakar, kross, bækur, vasar og dúkur eru borin fram. Þegar altarið hefur verið strípað er í Hallgrímskirkju borið fram Pelíkanaklæði Unnar Ólafsdóttur. Það er mynd fornrar sögu um pelíkana sem gaf ungum sínum af blóði sínu til að þeir mættu lifa. Þá sögu túlkuðu trúmenn aldanna sem táknsögu um að Jesús Kristur fórnaði líf sínu til að bjarga mönnum og heimi. Pelíkanaklæðinu er komið fyrir við altarið og blasir við söfnuðinum allt til páskamorguns. Fimm rauðar rósir eru lagðar á altarið og blómin eru tákn um síðusár Jesú Krists. Á páskamorgni er pelíkanaklæðið borið í skrúðhús. Dúkur og altarismunir eru bornir í kirkju til að fagna að dauðinn dó en lífið lifir. sáþ